መካነ ሕይወት መድኃኔዓለም ኦርቶዶክስ ተዋህዶ ቤተ ክርስቲያን ትግራይ ብጥሪ1/1980 ዓ.ም አቆፃፅራ ፈረንጂ ተመስሪቱ።ኣብዚ ፅሑፍ ዘለዉ ኩሎም ዕለታት ብኣቆፃፅራ ፈረንጂ እዮም። ዘአሓቲ አማኑኤል ኦርቶዶክስ ተዋህዶ ቤ/ክ ተባሂሉ ብሓደ ካህንን ብሠለስተ ምእመናንን ዝተመስረተ ደብርና፤ ኣብ አሜሪካ ቀዳማይ ቤ/ክ እምነት ተኸተልቲ ኦርቶዶክስ ተዋህዶ እዩ:: ደብርና ኣብ ኮሎምብያ መንገዲ, ዋሽንግተን ዲሲ ብኽራይ ገዛ አገልግሎት ምሃብ ጀሚሩ። ብፁዕ ወቅዱስ አቡነ ማትያስ ብጥሪ 1982 ዓ.ም ካብ ኢየሩሳሌም መፅኦም ኣገልግሎቶም ዝሃቡሉ ዓብዪ ደብሪ እዩ::ቅዱስነቶም ብወርሒ ነሐሰ 1984 ዓ.ም መራሒ፡ ኣቦን፤ መገልገልን ኮይኖም ሓዋሪያዊ ስርሖም ቀፂሎሙዎ::
ካብ ጥሪ 14/1987 ዓ.ም ጀሚሩ ናይ ደብርና ሸም መካነ ሕይወት መድኃኔዓለም ኦርቶዶክስ ተዋህዶ ቤተ ክርስቲያን ተባሂሉ ክፅዋዕ ተወሲኑ። እዚ ቤተ ክርስትያን ተማሕይሹን ተጠናኺሩን ኽቕፅል አቦና ብፁዕ ወቅዱስ አቡነ ማትያስ ዓብዪ ፃዕሪ ገይሮም እዮም ።ብናይ ኢኮኖሚያዊን ካህናት ሕፅረት ኣገልግሎት ከይቋረፅ’ውን ብፁዕ ወቅዱስ አቡነ ማትያስ ዘድሊ ኩሉ ሓገዝ ብምግባርን ወንጌል ብምምሃርን ዓብዪ ግደ ተፃዊቶም እዮም።
ብ1987 ዓ.ም ኣገልግሎት ዝህበሉ ካብ ዝነበረ ኮሎምብያ መንገዲ ኣብ ኖርዝ ካፒታል ናብ ዝርከብ ሉተራን ቤተ ክርስትያን ብምዝዋር ብውሕድ ኪራይ አገልግሎቱ ምሃብ ቀፂሉ። ኣገልግሎቱ እንዳሰፈሐ ምስከደ ድማ አባላቱ ምብዛሕ ጀሚሮም።
ብ1990 ዓም ዝመሓደረሉ ሕገደንቢ እንትርቀቕ ኣብ መንጎ ምእመናን/ናት ብዝተለዓለ ምውጣጥ ክሳብ አገልግሎት ምቋሪፅ ዝበፅሕ ሸግር ምክፍፋል ተፈጢሩ ነይሩ። ብ1992 ዓ.ም አቦና ኣብ 16 ስትሪት ዋሸንግተን ዲሲ ቤተ ክርስትያን ብምክራይ ምስቶም ዝተረፉ ምእመናን/ናት ኮይኖም አገልግሎት ቀፂሎምዎ። ዝኹሉ ፈተና ተሓሊፉ ምእመናን/ናት ቤተ ክርስትያን መድኃኔዓለም ብ2013 ዓ.ም ኣብ 2715 22 መንገዲ ዋሽንግተን ዲሲ (2715 22nd St NE Washington DC, 20018) ዝርከብ ናይ ባዕልና ቤተ ክርስትያን ክንገዝእ ክኢልና።ሕዝ’ውን ኣገልግሎት ንምስፋሕን ንኣባላትና ዝምጥን ሰፊሕ ቤተ ክርስቲያን ንምግዛእ ኣብ ምድላይ ንርከብ።
ወስብሐት ለእግዚአብሔር ወለወላዲቱ ድንግል ወለመስቀሉ ክቡር አሜን
